Fýra fakfeløg aftrat vísa nú sín stuðul til Felagið Føroyskir Sjúkrarøktarfrøðingar, ið fríggjadagin boðaði frá verkfalli, eftir at samráðingarnar millum fakfelagið og Lønardeildini hjá Fíggjarmálaráðnum ikki komu á mál.
Talan eru um feløgini í Samtak, Føroya Arbeiðarafelag, Føroya Fiskimannafelag, Klaksvíkar Arbeiðskvinnufelag og Klaksvíkar Arbeiðsmannafelag, ið vísa sín stuðul. Fyrr í dag vísti Skipara- og Navigatørfelagið eisini sín stuðul til verkfallið.
Yvirlýsingin frá feløgunum í Samtak er fylgjandi:
Feløgini í Samtak – Føroya Arbeiðarafelag, Føroya Fiskimannafelag, Klaksvíkar Arbeiðskvinnufelag og Klaksvíkar Arbeiðsmannafelag - vilja hervið lýsa sín treytaleysa stuðul til Felagið Føroyskir Sjúkrarøktarfrøðingar í stríði teirra at fáa betri sømdir fyri limir sínar.
Feløgini í Samtak heita samstundis á limir sínar um ikki at taka upp verkfalsrakt arbeiði.
At enda vilja feløgini heita á Fíggjarmálaráðið um at seta seg aftur við samráðingarborðið og føra veruligar samráðingar.
Við fakfelagskvøðu,
Georg F. Hansen, formaður í Føroya Arbeiðarafelag
Jan Højgaard, formaður í Føroya Fiskimannafelag
Jastrid W. Niclasen, forkvinna í Klaksvíkar Arbeiðskvinnufelag
Arthur Guðjonsson, formaður í Klaksvíkar Arbeiðsmannafelag
