Tann fyrsta september búðu 48.451 fólk í Føroyum. Tað eru er 21 fólk færri enn 1. september í fjør, vísir ein uppgerð hjá Hagstovuni.
Í 12-mánaða skeiðinum 1. sept. 2010 til 1. sept. 2011 vórðu 613 børn fødd og 353 fólk doyðu.
Burðaravlopið var sostatt 260.
Men samstundis fluttu 1.567 fólk av landinum og 1.286 fluttu til Føroyar.
Hetta gevur eina nettoflyting av landinum uppá 281 fólk og sostatt minkaði fólkaalið 21 fólk tilsamans.
Fólkatalið minkaði í 19 kommunum og tað vaks í 11 kommunum. Størsti vøksturin, sum er upp á 73 fólk, var í Klaksvíkar Kommunu.
Størsta minkingin, sum var upp á 29 fólk, var í Nes Kommunu.
Fólkatalið vaks í Viðoy og Borðoy. Tað stóð mest sum í stað í Eysturoy og Streymoy. Men í hinum 12 oyggjunum minkaði fólkatalið.
Støðan er framvegis tann, at fólkatalið minkar í útoyggjunum Fugloy, Svínoy, Kalsoy, Hesti, Mykinesi og Skúvoy.
Minkingin í Kunoy er lutfalsliga av teimum størstu, hóast tað er koyrandi til og frá. Merkisvert er eisini, at í Vágoy, har størsti fólkavøksturin hevur verið seinastu árini, er hetta vent til eina minking seinastu 12 mánaðarnar. Hinvegin sær tað út til at gongd er komin á fólkavøksturin í Borðoynni.
Størsta minkingin var í Suðuroy, har fólkatalið minkaði 39 fólk og størsti vøksturin í Borðoy, har tað vaks 78 fólk, upplýsir Hagstovan.
Tilvildarlig mynd
