Hagstovan hevur gjørt fólkatalið upp og á heimasíðuni stendur, at tann 31. august búðu 48.576 fólk í Føroyum.
Fyrstu átta mánaðirnar í ár minkaði fólkatalið 20 fólk. Sama tíðarskeið í fjør var minkingin 182 fólk. 3 børn fleiri vórðu fødd samanborið við í fjør, meðan 54 færri doyðu. Hinvegin fluttu 66 fólk færri av landinum og 39 fleiri fluttu til Føroya.
Orsøkin til, at at fólkatalið ikki er minkað líka nógv fyrstu átta mánaðirnar í ár, sum tað gjørdi somu mánaðirnar í fjør, er í høvðusheitum tann, at færri fólk fluttu av landinum og færri fólk doyðu.
Annars vísir talvan, at tað var bara í Sandoy, at burðaravlopið var negativt fyrstu átta mánaðirnar í ár. Tað merkir, at fleiri doyðu enn tað vóru fødd.
Men annars minkaði fólkatalið allastaðni uttan í Suðurstreymoyni og í Vágum.
August er hin stóri fráflytingar mánaðin, tí hetta er mánaðurin, tá ið tey flestu flyta av landinum at fáa sær útbúgving, Uppgerðin hjá Hagstovuni vísir, at í august í ár minkaði fólkatalið 348 fólk.
