Higartil eru ikki tekin um veitanartrupulleikar av heilivági til føroyingar. Tað sigur Hjalti Gunnarstein, landsapotekari.
Men fyri at kunna tryggja sær, at heilivágur ikki fer at mangla í, fer eisini Apotekið at seta tiltøk í verk.
Hetta merkir, at fólk sleppa ikki at hamstra heilivág, tí tey fáa ikki meiri enn ta nøgd av heilivági, ið svarar til eina vanliga nýtslu hjá tí einstaka.
– Somuleiðis kunnu viðskiftafólk bert keypa ein pakka í senn, av sama slagi av heilivági, sum er í hondkeypi.
– Vit mæla fólki til at vísa samfelagsanda og ábyrgd og tí mæla vit frá, at fólk keypa heilivág niður fyri, sigur apotekarin.
Hann heitir eisini á viðskiftafólk á Apotekinum um at halda seg passaliga langt frá øðrum fólkum, men reglurnar eru, at hava fólk sjúktekin, eiga tey ikki at koma á aoptekið.
Og samstundis heita tey á viðskiftafólk um at nýta gjaldskort fyri at sleppa undan at handfara pengar, sum hava verið ígjøgnum fleiri hendur.
