Jakku í Hjøllum er sonur Ulrikku og Óla Olsen (í Hjøllum) á Toftum. Hann er giftur við Elsu av Skipanesi, og eiga tey 7 børn
Sum blaðungur fór hann til skips og sigldi millum annað undir krígnum til Bretlands við fiski. Seinni var hann í mong ár við Høganesi og kenda skiparanum Dia á Roykheyggi. Seinast í 1950-unum fór Jakku at arbeiða hjá D.P.Højgaard á Tofum. Meginpartin av tíðini arbeiddi hann sum formaður fyri garnareiðskapin hjá skipunum í góðu sildaárunum í 1960-unum. Seinast í 1960-unum fekk Jakku starv sum postmaður á Toftum og røkti hetta starv í 25 ár, tá ið hann fór frá fyri aldur.
Í frítíðini hevur Jakku havt mong ítriv, men mest av tíðini er brúkt í bátinum og til heimaseyðin. Sjálvt um árini eru blivin mong, so gongur hann nógv upp í heimaseyðin, og hann er framvegis fastur áskoðari til dystirnar hjá B68.
Jakku er kendur sum ein skilamaður bæði á sjógvi og landi. Hann hevur eitt lætt sinni og dugir væl at siga frá, og ofta kanst tú fáa eina sera skemtiliga toftasøgu frá honum.
Sum yngri luttók Jakku í kommunalpolitikki, og seinni var hann í mong ár í kirkjuráðnum, har hann var við, tá ið Fríðrikskirkjan varð bygd.
Altíð er hugnaligt at koma á gott hjá Elsu og Jakku í Hjøllum, har blíðskapurin er óførur.
Vit ynskja tygum hjartaliga tillukku við føðingardegnum við vón um Guðs ríku signing í komandi døgum. Vit gleða okkum til føðingardagshaldið á Svangaskarði sunnudagin 22. august kl. 17.
Vinur
