Jógvan við Keldu heldur ikki, at hetta er júst tann rætta loysnin, men hann er kortini fegin um uppskotið, tí hann heldur, at viðgerðin av hesum málinum á tingi fer at gagna víðari viðgerðini í Innlendismálaráðnum.
Seinasta broytingin í valskipanini var gjørd í sjeytiárunum, og fyrstu ferð roynd í verki í 1978. Tá var talið av eykamandatum minkað niður í 5 og talið av umdømisvaldum hækkað til 27. Síðani tá hevur løgtingið altið verið fullmanna, hóast valúrslitið í prinsippinum kann fella soleiðis út, at eingi eykamandat verða at býta út. Tá hevði tingið bara havt 27 fólk.
Næstseinasta stóra broytingin var gjørd í sekstiárunum, tá farið varð frá at stilla valevni upp í nummarøð til tað skipanina, vit hava í dag. Tá høvdu valfeløgini størri ávirkan á, hvør kom at umboða flokkin á tingi, tí tann, ið stóð sum nummar eitt á listanum hevði fyrimunir fram um hini.
