Bæði Landskassin og kommunukassarnir fáa framveigis nógvar inntøkur av skatti og tað sær ikki út til, at korona hevur ávirkað støðuna.
Ein uppgerð hjá Taks vísir, at fyrstu átta mánirnar í ár, fingu kommunurnar 1,370 milliardir í inntøkum av skatti og tað eru 55,9 milliónir, ella 4,25 meiri enn tær fingu í sama tíðarskeiði í fjør.
Tað er sama søgan hjá landskassanum, tí í tíðini frá januar til august í ár, fekk landskassin 1,156 milliardir í inntøku av skatti og tað eru 55,4 milliónir, ella 5,03 prosent meiri enn landskassin fekk í inntøku í átta teir fyrstu mánaðirnar í fjør.
Allarflestu kommunurnar hava fingið meiri inn í skatti í ár, men kortini eru tað sjey kommnur, har skattainntøkan er minkað eitt vet. Yvirhøvur er talan um smáar kommunur, men í Vágs kommunu hevur inntøkan av skatti verið slakar 30, 7 milliónir inn higartil í ár og tað eru 0,29 prosent minni enn í sama tíðarskeiði í fjør. Sunda kommuna hevur fingið slakar 48,8 milliónir inn í skatti higartl í ár og tað eru 0,88 prosent minni enn í sama tíðarskeiði í fjør.
