Við uppskotinum hjá samgonguni um nýggja útlendingalóg verður latið upp fyri útlendskari arbeiðsmegi. Samgongan miðar eftir at nýggja útlendingalógin skal koma í gildi 1. juli, og kemur hon tað verður tað eisini møguligt frá tí degi at innflyta útlendska arbeiðsmegi.
Tað er við hesum í huga, at ein íslendsk vikarfyritøka í hesum døgum ringir føroyskar fyritøkur upp fyri at bjóða fram polska arbeiðsmegi. Ein av fyritøkunum, sum hevur fingið bjóðað polska arbeiðsmegi, er Hiti.
- Talan er um eina fyritøku, ið nevnist Voot. Tey hava kontaktað okkum og bjóðað okkum polska arbeiðsmegi, sigur Áki Mortensen, stjóri í Hita.
Hann greiðir frá, at tað einasta, fyritøkurnar skulu gera, er at hava póllendingarnar í arbeiði, so verður fyritøkan fakturerað av Voot fyri tímarnar, útlendingarnir arbeiða.
- Útlendingarnir kosta 190 krónur um tíman. Tá rindar Voot fyri innivist, mat, tryggingar og annað, sigur Áki Mortensen.
Hann sigur, at sambært Voot er talan um dugnaligt fólk, men tað kunnu vera ávísir trupulleikar við samskiftinum, tí póllendingarnir í stóran mun ikki eru so stinnir í enskum.
Gott við møguleikanum
Sjálvur heldur Áki Mortensen, at tað kanska er í seinna lagi at fáa bjóðað útlendska arbeiðsmegi, í hvussu er innan hansara arbeiðsøki, men hevði hetta tilboðið komið í fjør metir hann, at teir helst høvdu tikið av.
- Tað er í hvussu er positivt, at tað nú verður møguligt við útlendskari arbeiðsmegi, sigur Áki Mortensen.
Hann ivast í, hvussu stórur tørvurin er á útlendskari arbeiðsmegi í byggivinnuni í dag, men innan fiskivinnuna skríggja tey eftir arbeiðsmegi.
- So har kemur tað væl við, at tað nú verður lættari hjá útlendingum at koma til landið at arbeiða, sigur Áki Mortensen.
Uppskotið um nýggja útlendingalóg tykist hava allar møguleikar at verða samtykt, tí umframt samgonguna tekur Fólkaflokkurin í hvussu er undir við uppskotinum, sum í nógvar mátar er identiskt við tað uppskotið, undanfarna samgonga arbeiddi við.
Tískil bendir alt á, at tað frá 1. juli verður gjørligt hjá føroyskum fyritøkum at fáa inn útlendska arbeiðsmegi.
