- Aftur í ár hevur Eysturkommuna skipað fyri verkætlanini Ung í Arbeiði, har ungir eysturbúgvar, ið júst eru lidnir í 9. flokki, hava møguleika at ogna sær nakrar arbeiðsroyndir í summarfrítíðini. Hetta skrivar heimasíðan hjá Eystur kommunu.
Omanfyri 30 ung hava nú í eina viku starvast fyri kommununa við at fríðka um umhvørvið í bygdunum í Eysturkommunu, og tey halda áfram í hesa vikuna afturat.
- Tey hava verið ófør, sigur Jonhard Joensen, arbeiðsformaður, ið hevur ábyrgd av unga arbeiðsflokkinum. Tað er gott hjá teimum at sleppa at royna seg sindur innan arbeiðslívið meðan tey ganga í skúla, og samstundis vinna sær sindur av peningi.
Tey ungu lúka, raka gras, rudda framvið áum og gøtum, umvæla og fríðka um spæliplássi í Syðrugøtu, hjálpa til at gera sniðgøtur í Syðrugøtu og Leirvík, og velta og planta saman við gartnaranum.
Høvuðstættirnir í hesi verkætlan, ið hevur verið nýtt í kommunum kring landið í mong ár, er at ung fáa ein møguleika at venja seg við arbeiðslívið og at vinna sær pening, samstundis sum umhvørvið í kommununi verður fríðkað, skrivar eystur.fo.
