Fram til fyri tveimum árum síðani var Høgni í Stórustovu kanska ikki tann, sum mest varð tosað um í føroyskum fótbóltshøpi. Gaman í mundu summi minnast hann sum part av HB-liðnum gjøgnum størsta partin av 80’unum, og eisini innan badminton gjørdi hann nakað um seg.
Færri mundu kanska vita, at hann framvegis var eitt sindur virkin handan leiktjøldini. Hetta sum speiski viðmerkjarin í HB-leikskránni, har hann bar heitið »Eygleiðarin úr Casagrande«. Ofta við sera beinraknum viðmerkingum, ið næstan munnu tola samanbering við Tavse Tipper Thomsen, sum ígjøgnum nógv ár eygleiddi bæði danskan og altjóða fótbólt úr síni klummu í danska Tipsblaðnum.
Eygleiðarin fór tó í grøvina, tá Høgni fyri tveimum árum síðani varð valdur í nevndina hjá FSF. Alt fyri eitt kom hann í hampuligan mótvind, tá hann stóð mest sum einsamallur móti restini av nevndini í trætuni um heimsins kendasta spæliloyvi í Føroyum. Nevnliga Páll Mohr Joensen-málið. Og eisini í øðrum førum hevur hann víst, at hann er ikki bangin fyri at taka eina støðu, hóast hendan ikki fylgir meirilutanum.
Enn eru tó eingi sum helst tekin um, at nývaldi forsetin ætlar sær í nakað stríð við nevndina. Tvørtur ímóti eru boðini, at royndin fyrst og fremst skal fevna um at finna eitt felags stev, soleiðis at føroysku feløgini og FSF í einum samlaðum taki kunnu lyfta føroyskan fótbólt enn longur framá.
---
Fakta um forsetan
Høgni í Stórustovu
Føddur: 19. mars 1965
Giftur Jónu Gunleivsdóttir Dalsgarð og saman eiga tey børnini Tróndur (18 ár), Brandur (10 ár) og Báru (8 ár)
Útbúgvin løgfrøðingur
Starvsroyndir: løgfrøðingur á ALS 1995-97, fulltrúi í Vinnumálaráðnum 1997-99, løgfrøðingur og síðani deildarstjóri á skaðadeildini á Tryggingarfelagnum Føroyar 1999-2005, løgfrøðingur í Føroya Banki 2006 og í starvi hjá VÍS (tryggingarfelag) frá november 2006. Síðani 2000 hevur hann verið nevndarlimur í Ráðnum fyri Ferðslutrygd og síðani 2006 hevur hann verið formaður.
