Í kvøld, sunnukvøldið 18. oktober, letur upp listaframsýning í Glyvra kirkju. Tað er Eyðun av Reyni, ið sýnir fram sína list, og framsýningin er eisini partur av skránni fyri mentanarvikuna Skýming.
Tá framsýningin letur upp í kvøld, fer Oggi Lamhauge, sum sjálvur er listamaður, at greiða frá myndlistini hjá Eyðuni, og tónleikur verður eisini á skránni.
Hvørt kvøld næstu vikuna frá klokkan 20 til 22 verður tiltakið List og Kvirra í Glyvra kirkju.
Meinhard Bjartalíð, sóknarprestur, sigur, at hetta er tjúgunda listaframsýningin, sum verður sett upp í kirkjuni, síðan forkirkjan í Glyvra kirkju varð gjørd til listaskála í 2009.
Fleiri spennandi listafólk hava sýnt fram undanfarin ár. Listaskálin er vorðin ein partur av forkirkjuni, og tað er líka sum, at fólk sakna, tá eingi listarverk hanga uppi í kirkjuni.
- Nú verður so aftur høvi at síggja listina hjá einum av okkara kendu listafólkum, sigur Meinhard Bjartalíð, prestur.
Í kvøld frá klokkan 20 til 21 verður aftansongur eftir enskari fyrimynd í Glyvra kirkju. Her verður Kór Glyvra kirkju við, liturgur verður Meinhard Bjartalíð, og organistur verður Jensina Simonsen.
