Farna vikuskiftið luttók Eyðstein Simonsen í einari av fremstu CrossFit-kappingunum í heiminum, “French Throwdown”, í París, har hann fekk eitt flott triðja pláss.
French Throwdown er ein altjóða CrossFit kapping við luttakarum úr øllum heiminum.
- Eyðstein luttók í aldursbólkinum 45-49 ár, har einans 10 íðkarar sluppu við. Í vár gjørdist Eyðstein nummar níggju av fleiri enn 100 luttakarum í innleiðandi umfarinum og vann sær tá luttøku í finaluni í París.
Tað sigur Bartal Kamban í tíðindaskrivi vegna venjarar og limir í Tvørmegi CrossFit.
CrossFit hevur rættiliga tikið seg fram sum ítróttargrein um allan heim farnu árini - eisini í Føroyum, har talið av íðkarum er skjótt veksandi. Fleiri føroyskir íðkarar hava farnu árini roynt seg í altjóða kappingum.
Eyðstein hevur í seks ár havt ein skaða í fótinum, sum hevur darvað venjingini og hevur forðað honum at luttaka í øllum kappingum.
- Tað, at kvalifisera seg til French Throwdown-finaluna, var sostatt ein sigur í sær sjálvum, men at tað skuldi røkka til eitt triðja pláss, er meira enn hann tordi at vóna, siga tey í Tvørmegi CrossFit, har tey ynskja Eyðsteini Simonsen hjartaliga tillukku við flotta úrslitinum.
