Umframt at vera portørur í 40 ár er Eyðbjørn eisini kendur sum instrukørur í fyrstuhjálp og frá sang- og tónleikabólkinum “Tey av Kamarinum”.
Tá Eyðbjørn varð settur í starv sum portørur tann 1. januar í 1968, vóru teir fimm portørar á Landssjúkrahúsinum og ein ambulansa. Teir arbeiddu í vaktarskipanum og høvdu ábyrgdina av sjúkraflutninginum alt samdøgrið allar dagar í vikuni. Eyðbjørn var eisini í fleiri ár ein av vaktleiðarunum hjá portørunum.
Umframt sítt arbeiði sum portørur varð Eyðbjørn í 1975 sendur av Reyða Krossi til Danmarkar at útbúgva seg til instruktør í fyrstuhjálp. Í eini 25 ár undirvísti hann í fyrstuhjálp, bæði á kvøldskúlanum, sjúkrasystraskúlanum og aðrastaðni við.
Eyðbjørn er eisini kendur sum gittarleikari í bólkinum “Tey av Kamarinum”, har hann síðan 1955 hevur spælt saman við systkjum, familju og øðrum. “Tey av Kamarinum” hava hesi meira enn fimmti árini givið út nógvar plátur og fløgur, sum eru vorðnar kendar um alt landið.
Eyðbjørn er í dag 67 ára gamal, nú hann hevur lagt frá sær á Sjúkraflutningstænastuni á Landssjúkrahúsinum.
