Høvdu tey evropeisku londini gjørt sum USA, hevði ES ikki havt so stórar búskaparligar trupulleikar at drgaast við. Tað segði amerikanski forsetin, Barack Obama, í einari valrøðu í býnum Seattle. Hann segði eisini, at trupulleikarnir í Evropa eru ein álvarssamur trupulleiki fyri USA, tí teir tálma amerikanska vøkstrinum.
-Vit hava framvegis mótvind. Evropa er enn í einari truplari støðu, og tað kemst millum annað av, at londini ikki tóku líka munagóð stig sum vit, segði Obama. USA samtylkti í 2009 ein endurbyggingarpakka, sum millum annað bjargaði amerikanska bilídnaðinum.
Vøksturin í amerikanska búskapinum kann fáa avgerandi týdning fyri møguleikarnar hjá Obama at verða afturvaldur á forsetavalinum tann 6. november.
