Everton fekk javnt á Emirates

Hóast Ozil levði Arsenal framum, tá bara 10 minuttir vóru eftir, so fekk Everton stig við sær úr London

Mikukvøldið vann Everton á útivølli móti Manchester United og í dag var aftur talan um stóra uppgávu, tá teir bláu vitjaðu hjá oddaliðnum, Arsenal.

 

Tað var heimaliðið, sum trýsti mest, men tað var leingi líkt til, at eitt væl skipað Everton skuldi fáa málleysan javnleik.

 

10 minuttir undan dystarloki skoraði Mersut Ozil úr stuttari fjarstøðu, men oddaliðið megnaði ikki at halda fast um leiðsluna, tí bara fáar minuttir seinni javnaði Gerard Deulofeu.

 

Á Craven Cottage eydnaðist fyrr í dag Fulham at vinna 2-0 móti Aston Villa. Steve Sidwell og Dimitar Berbatov skutu málini hjá Fulham, sum framvegis er undir niðurflytingarstrikuni, men nú er tað bara málmunurin, sum heldur West Ham frammanfyri.