- Tað tykist, sum ES bara vil kroysta lítlu tjóðina Føroyar, men vit hava rætt at fiska makrel, og tann rættin lata vit ikki frá okkum hóast trýst, sigur Jacob Vestergaard Seinasta umfarið av makrelsamráðingunum slitnaðu í gjár. Orsøkin er, at ES og Noregi bara vilja trýsta lítlu tjóðina Føroyar, og royna at tengja bilateralar avtalur upp í makrelsamráðingarnar.
Tað heldur Jacob Vestergaard, fiskimálaráðharri.
- Tað líkist mest av øllum imperalistiskum hugsunarhátti, tað, sum ES førir fram, sigur Jacob Vestergaard.
Hann vísir eisini á, at Noregi als onga virðing hava fyri Føroyum, og tað sæst best av, at norðmenn hava endurnýggjað avtaluna við Ísland um fiskiveiði í Barentshavinum.
- Hetta eru eini rættindi, sum íslendingar hava tiltuskað sær, og sum norðmenn bara góðtaka. Men tað vísir seg, at tá tað kemur til føroyingar, er søgan ein heilt onnur, sigur Jacob Vestergaard.
Fiskimálaráðharrin heldur fast við, at føroyingar hava rætt at fiska makrel, og tað er ein rættur, sum vit ikki fara at sleppa.
- Tað er púrasta óvirðiligt, tað, sum ES ger, og vit hava gjørt púra greitt, at vit finna okkum ikki í at ES og Noregi royna at tvinna onnur viðurskifti upp í samráðingarnar um makrelin, sigur Jacob Vestergaard.
Tað nýggjasta í málinum er, at Noreg hevur boðað frá, at teir ætla sær at taka stig til eina nýggja samráðingarroynd í januar.
