At hann harafturat saboterar sín egna partamann beint uppundir valið, vísir hvørki stórsinni ella disiplin, men tvørturímóti ein desperatan løgtingsmann, sum aftaná eitt stórt misálit til Fólkatingsvalið, nú roynir at bjarga sær nakrar atkvøður uppá eitt projekt, sum als ikki er búgvi at taka støðu til.
Mær er fortalt av skilamanni úr Lamba, búsitandi í Vágum, at menn við Skálafjørðin ikki kundu fara í torv í fleiri vikur, so nógvur mjørki var á eysturættini.
Sama ger seg galdandi í Tórshavn, har valla sæst ímillum húsini á eysturættum.
Sjálvsagt eru trupulleikar við mjørka á verandi flogvølli, eins og turbulensur á sunnanætt, alt annað vildi verið løgið. Men sum sagt, er hettar eitt fyribrigdi, óansæð hvar í Føroyum tú er staddur.
Og harafturat um ein metir útfrá tí orðaskifti, ið fram er farið ímillum leikmenn eins og serfrøðingar á økinum, so fer ein at ivast í, um tað yvirhøvur er gjørligt, at finna hóskandi lendi, til tann so nógv umstrídda altjóða flogvøllin.
Eg haldi, at tað hevði verið hóskandi at bíða, til allar neyðugar kanningar av altjóða serfrøðingum eru lidnar, tí tá kann væl henda, at hendan risaætlan er ein sápubløra, ið brestur, fyrst og fremst tí Føroyar er eitt pinkulítið oyggjaland og veðurviðurskiftini stórt sæð eru tey somu viðvíkjandi mjørka og turbulens, bæði á Glyvursnesi, á Skorðhædd og í Vágum.
PS. Tað er ein loddrøtt loygn, tá T. Jacobsen gevur lesarum ta fatan, at tað bert eru flogførini ið Atlantic hevur í løtuni, ið kunnu nýtast á Føroyaleiðini.
Seinast Maersk fleyg, nýttu teir flogfør av slagnum Boeing, ið tók 140 ferðafólk, eins og Airbus hevur flogfør, ið taka líka nógv sum boeing. So eg haldi, at trúvirði hjá T. Jacobsen er í botni í løtuni.
