Gjáramorgunin visti vaktleiðarin á løgreglustøðini at siga, at onkur hevði brotið inn í Mikkeller í Gongini 2 í Havn.
Ein rútur varð brotin og tann ella tey, sum høvdu verið inni, høvdu stolið nakað av pengum og rúsdrekka.
Aftur í morgun visti vaktleiðarin at siga, at enn eitt innbrot hevur verið í Mikkeller.
- Aftur hesaferð hevur málið verið pengar og rúsdrekka, sigur løgreglan.
Sum skilst á vaktleiðaranum, eru málini enn ikki uppklárað, men arbeitt verður við at finna út av, hvør ella hvørjir innbrotstjóvarnir eru.
Nøkur innbrot og tjóvarí hava verið í høvuðsstaðnum seinastu tíðina.
Herfyri hevði onkur verið inni í matgoymsluni á Hotel Hafnia, og onkur hevði brotið inn í Fisk & Chips á Vaglinum í Havn.
Vaktleiðarin visti í morgun at siga, at tey arbeiða við at uppklára málið um innbrotið í Mikkeller.
- Kannað verður eisini, um samanhangur er millum hesi innbrot og tjóvari, sum hava verið hesar seinastu dagarnar, sigur løgreglan.
