Ari Olsen var aftur við frá dystarbyrjan, tá hann og liðfelagarnir í Vendsyssel í dysti í triðbestu donsku fótbóltsdeildini vunnu 2-1 á Thisted í Hjørring.
Thisted var á odda 1-0 í steðginum. Við tveimum málum upp á tveir minuttir í seinna hálvleiki megnaði heimaliðið at venda 0-1 til ein 2-1 sigur.
Lasse Steffensen og Malthe Henriksen stóðu fyri málunum hjá Vendsyssel.
Vendsyssel er fjórðfremst í deildini við 34 stigum.
Ari hevur í trimum kappingardystum saman við liðfeløgunum vunnið sjey av níggju møguligum stigum. Harímillum eru tveir sigrar á heimavølli.
Hørður H. Askham kom á vøllin í 84. minutti, tá lið hansara FC Roskilde tapti 0-1 fyri Helsingør á heimavølli. Gestirnir skoraðu sigursmálið beint undan steðginum.
Roskilde er nummar trý í deildini við 35 stigum.
