07 Vestur heldur fram við at brynja seg til nýggja ævintýrið í bestu deildini, og í kvøld kunnger felagið, at sáttmáli er gjørdur við enn ein útlendskan leikara.
Talan er um norska miðvallaran, Martin Heiberg. Hann er 24 ára gamal og kemur úr felagnum Raufoss í næstbestu norsku deildini.
- Martin hevði týðandi leiklut í uppflyting teirra í fjør, og fer at vera okkum góður styrkur komandi kappingarárið, skrivar 07vestur.fo.
Fyri lítlari viku síðani kunngjørdi 07 Vestur eisini norska áleyparan, Erik Myklebust, sum síðstu tvey árini hevur skotið 36 mál í 45 dystum fyri Vard Haugesund í triðbestu norsku deildini.
07 Vestur hevur eisini fingið tilgongd av eitt nú Silasi Eyðsteinssyni, Heina Mortensen og Dánial Paula Lervig.
