Tað hevur mangan verið baldrut at koyrt yvir Hóvsegg í tøttum mjørka ella kavaroki, gleri og stormi, so nú hava suðuroyingar langt um leingi fingið virðiligt vegasamband bygdanna millum.
Semjan um Hovstunnilin hevur tikið drúgva tíð, men leingi er tað, ið væl skal vera, tí gott er, at tunnilin kom ígjøgnum, har hann er nú, og ikki uppi í fjallinum nærri Hovseggini, tí so var einki vunnið. Her er enn eitt dømi um eina rætta loysn, tá ið suðuroyingar standa saman.
Fólkaflokkurin kann fegnast um, at hava havt ein virknan leiklut í øllum framtøkum, ið hend eru fyri Suðuroynna í seinastuni. Nýggjan Smyril, nýggja ferjulegu við termunali á Krambatanga, Djúphavn í Vági og nú Hovstunnilin.
Sett er út í kortið við nýggjum eftirskúla í Hvalba, og er tað mín vón, at hesin skúli verður til veruleika. Suðuroyingar fáa eisini ein miðnámsskúla í Hovi í næstum, spell at hann ikki varð bygdur í Vági sum upprunaliga ætlað, men vónandi fer hesin skúli at betra um umstøðurnar hjá ungdóminum í oynni. Líka so umráðandi tað er, at vegasambandið er gott, og eitt gott samband er til meginøkið, líka so umráðandi er tað, at ungdómurin støðast og trívist í oynni, soleiðis at Suðuroyggin framhaldandi kann menna seg.
