EM: Føroyar eru liðið við lægstu miðalhæddini

Hagfrøðingurin, Regin Reinert hevur verið so beinasamur, at hann hevur nærhugt ymisk hagtøl í samband við EM-endaspælið í hondbólti hjá monnum í hondbólti, ið byrjar í morgin.

Ofta hevur verið sagt at føroyskir hondbóltspælarar eru ov lágir í mun til spælarar hjá hinum landsliðunum. Føroyska liðið í komandi EM-endaspælinum hevur eisini lægstu meðalhæddina av øllum, men hon er ikki so nógv aftanfyri hini londini. Meðalhæddin á føroyska liðnum er 188,1 cm. Lægstu miðalhæddina aftaná Føroyar hevur Grikkaland, har ið meðalhæddin er 188,9 cm. Ungarn hevur hægsta EM-hópin, sum í meðal er 195,0 cm.

Hægsti spælarin á føroyska liðnum er Ísak Vedelsbøl við sínum 196 cm. Næstur á føroyska listanum er Teis Horn Rasmussen, sum er 195cm høgur. Hægstu spælararnir í allari kappingini eru teir tríggir Călin Dedu úr Rumenia, Bence Bánhidi úr Ungarn og Kamil Syprzak úr Fraklandi, sum allir eru 207 cm høgir. Lægsti spælarin í kappingini er Christos Kederis úr Grikkalandi, sum er 169 cm høgur.

Bert trý av EM-landsliðunum hava ongan spælara omanfyri tveir metrar. Tey eru Georgia, Svøríki og Føroyar. Kroatia hevur flest spælarar omanfyri tveir metrar. Har eru sjey leikarar í kroatiska hópinum, ið eru omanfyri tveir metrar. Póland, sum Føroyar møta í innleiðandi bólki D 15. januar, hava eins og Ungarn, seks spælarar, ið eru omanfyri tveir metrar.