EM-endaspælsævintýrið hjá føroyska kvinnulandsliðnum í hondbólti er liðugt á hesum sinni, har okkara fingu eitt stig fyri tríggjar dystir.
Nú er at heppa á ein greiðan sigur til Sveis móti Kroatia í dystinum, ið byrjar klokkan 19.30 í Sankt Jacobshøllini.
Vinnur Sveis við fimm málum ella ein størri sigur á Kroatia endar Kroatia aftast í bólki D, og Føroyar enda næstaftast í bólkinum.
Føroyar enda í ringasta føri á einum 19. plássi av teimum 24 liðunum í EM-endaspælinum.
Turkaland endaði aftast í bólki A við einum stigi og minus 34 í málúrtøku. Føroyar hava eitt stig og minus 12 mál.
Serbia endaði aftast í bólki B við ongum stigi. Portugal endaði aftast í bólki C við ongum stigi. Slovakia endaði aftast í bólki E við ongum stigi, og Ukraina endaði aftast í bólki F við ongum stigi.
Tað merkir, at Turkaland, Serbia, Portugal, Slovakia og Ukraina enda øll aftanfyri Føroyar, so okkara enda í ringasta føri á einum 19. plássi.
