Svøríki eru vertir fyri EM í kvinnufótbólti, og kappingin byrjar í morgin við luttøku av heilum fimm norðurlendskum londum.
Vertirnir Svøríki eru eitt norðurland av trimum í bólki A, meðan Noregi og Ísland eru í bólki B.
EM byrjar sum nevnt í morgin, og fyrsti dysturin verður klokkan 17.00 í bólki A millum Italia og Finland. Klokkan 19.30 møtast so arvafíggindarnir, Svøríki og Danmark.
12 long taka lut í EM, og tey eru býtt upp í tríggjar bólkar.
Bólkur A:
Danmark
Finland
Italia
Svøríki
Bólkur B:
Týskland
Ísland
Holland
Noregi
Bólkur C:
Ongland
Frakland
Rusland
Spania
Týskland er saman við nøkur av norðurlendsku liðunum millum favorittarnar, men tað má tó sigast, at bólkur C sær sterkastur út.
Danmark (myndin) og Svøríki áttu at komi sær víðari frá bólki A, meðan Týskland og Noregi eru favorittar í bólki B. Bólkur C er ein krúttunna, men kanska Ongland og Frakland eru bestu boðini har.
Eurosport vísir frá kappingini.
