SVIMJING
Elspa Mørkøre hevur í nógv ár verið ímillum mest evnaríku svimjarar í landinum, og ungi svimjarin úr Syðrugøtu blívur við at vísa síni góðu evnir í svimjihylinum.
Tá ið føroyameistaraskapurin var á skránni í Havnini næstseinasta vikuskiftið, var Elspa Mørkøre enn einaferð tann stóri heiðursmerkjaslúkurin. Hon vann ikki færri enn níggju gullheiðursmerki, samstundis sum hon setti fleiri nýggj met.
Av hesi orsøk kom tað helst ikki so óvart á øll, at Elspa Mørkøre bleiv vald til ársins svimjara hjá kvinnum. Men hon var kortini ovurfeagin um heiðurin.
- Eg eri sera glað fyri henda heiðurin. Tað hevur gingið væl í venjing ígjøgnum árið, og úrslitini hava eisini verið rættiliga góð, so hetta er slett ikki so galið.
Elspu gleddist eisini um góðu úrslitini hjá Fuglafjarða Svimjifelag í FM næstseinasta vikuskiftið.
- Tað var avbera gott at vinna føroyameistaraheitið við Fuglafjarða Svimjifelag síðsta vikuskiftið. Vit hava nógvar góðar ungar svimjarar, sum veruliga hava sligið til í seinastuni, og hetta er ein av grundunum til góðu úrslitini hjá FS. Eg haldi eisini, at svimjararnir hava tað gott saman, og so hevur tað hjálpt nógv, at vit eru farin at venja í Klaksvík, tí so sleppa vit at venja í einum størri hyli.
Gleðir seg til Oyggjaleikirnar
Næsta málið hjá Elspu og hinum føroysku landsliðssvimjarunum eru Oyggjaleikirnir, sum vera á Rhodos í juli. Fleiri av ungu føroysku svimjarunum hava sett fleiri nýggj met síðsta tíðina, og tí eru nógv, sum hava góðar vónir til svimjararnar á Oyggjaleikunum.
Elspa væntar eisini eitt gott úrslit, men hon sigur seg tó ikki kenna serliga nógv til svimjararnar frá hinum londunum.
- Fleiri av tíðunum, sum okkara svimjarar hava svomið síðstu tíðina, hava verið sera góðar í mun til oyggjaleikatíðirnar seinast, so eg havi hampiliga góðar vónir. Eg kenni tó ikki serliga nógv til svimjararnar frá hinum londunum, og tí er ilt at meta um, hvussu fer at ganga hjá okkum. Tað kann væl vera, at hini londini eisini eru nógv framfarin síðani síðstu leikir.
Hvussu er og ikki, so er einki at ivast í, at føroysku svimjararnir eru blivnir væl sterkari síðstu tvey árini. Hetta er Elspa eisini samd í.
- Føroyska svimjararnir hava betrað seg ótrúliga nógv, og hetta er eisini høvuðsorsøkin til, at vit hava vónir um at fáa eitt gott úrslit á Rhodos, sigur ársins svimjari hjá kvinnum at enda.
