Elias Ellefsen á Skipagøtu var avgerandi leikarin, tá ið IK Sävehof í kvøld vann aðru fjórðingsfinaluna í svenska meistaraheitinum og nú er sera tætt við at røkka hálvfinaluni.
Tað sá annars svart út hjá IK Sävehof, sum var um reppið at tapa, men Elias javnaði til 23-23 tá ið eitt sekund var eftir av dystinum og syrgdi fyri at dysturin fór í longda leiktíð.
Í longdu leiktíðini skeyt Elias trý mál og var við til at tryggja IK Sävehof ein 31-28-sigur. Elias skeyt tilsamans átta mál í dystinum.
IK Sävehof er nú á odda 2-0 í dystum í fjórðingsfinaluni, har spælt verður fyrst upp í tríggjar dystir. Næsta fjórðingsfinalan verður nú sunnudagin kl.14.30.
