Hondbólts-Føroyar fegnast, og enn eru fleiri sum ikki eru lend aftaná harða leikin móti Eysturríki, har tað eydnaðist at knógva luttøkuna í EM-endaspælinum heim.
Ein av størri ítróttarmiðlunum í Kroatia, Ofenziva hevur roknað upp á ymiskt í samband við, at EM-undankappingin er lokin.
Og har hava teir funnið ein føroyskan vinnara.
Í allari EM-undankappingini hevur Elias Ellefsen á Skipagøtu besta miðalsnittið, tá um upplegg til mál (assist) ræður.
Elias var tíverri ikki við í teimum fyrru dystunum móti Ukraina og Eysturríki. Men í teimum fýra undankappingardystunum Elias leikti hevði hann heili 31 assist, og harvið eitt miðalsnitt upp á 7,75 mál pr. dyst, ið er tað hægsta assist-miðalsnittið í allari EM-undankappingini. Og so kunnu vit bara gita hvussu nógv assist talan hevði verið um, um hann leikti við í øllum seks undankappingardystunum.
Sambært Ofenziva var Hákun West av Teigum fimtbesti málskjúttin í allari EM-undankappingini við 39 málum, ið er eitt snitt upp á 6,5 mál, ið er eitt flott avrik hjá Hákuni.
Hákun skoraði samlað bert trý mál færri enn toppskjúttin í allari EM-undankappingini, Giorgi Tskhovrebadze úr Georgia.
