Eldri næmingar fáa yngri at røra seg
Í eina tíð hevur ein arbeiðsbólkur arbeitt við at fáa donsku ætlanina, ið nevnist Legepatruljen, at virka í Føroyum.
Føroyska heitið á verkætlanini er Spæliliðið og endamálið er at fáa næmingar at røra seg meir og verða kropsliga virknir, sigur Tórshavnar Býráð.
Í hesum sambandi verður dentur lagdur á at fáa teir yngru næmingarnar at spæla í skúlagarðinum í fríkorterunum.
Tað eru eldri næmingar í 6. og 7. flokki, sum skipa fyri.
Hesir næmingar hava verið á skeið, har teir hava lært, hvussu teir kunnu standa fyri hesi uppgávu.
Ein ella fleiri lærarar í skúlunum virka sum akkersfólk og skulu hjálpa næmingunum at skipa fyri.
Umboð fyri arbeiðsbólkin vóru á fundi við leiðslurnar í skúlunum í Tórshavnar kommunu í mars 2011. Leiðslurnar tóku væl undir við uppskotinum at seta ætlanina í verk í skúlunum her.
Spæliliðið er eisini ein liður at bøta um trivnaðin í skúlanum / fríkorterunum, og er tí tengt at AKT og SSP.
Í stuttum er endamálið við Spæliliðnum at fáa børn at vera úti og virkin í fríkorterunum, skapa betri trivnað og forða fyri happing.
Myndirnar eru tiknar í dag, tá Katrin Ellingsgaard, málsviðgeri í skúlamálum hjá Tórshavnar kommunu, og Heðin Mortensen, borgarstjóri, handaðu næmingunum skreytbløð.
