Í gjár skrivaði Sosialurin um, at eldrarøkt ikki er nakað fólk hava rætt til. Heldur er tað ein olmussa frá myndugleikunum, tí onki stendur í nakrari lóg, at røkt er ein rættur. Hetta líkar ikki Rósu Samuelsen, landsstýriskvinnu.
- Vit mugu sjálvandi hava eina eldralóg, sum staðfestir eitt minstakrav fyri fólk, ið hava tørv á røkt, sigur Rósa Samuelsen. Hon vísir somuleiðis á, at hetta verður ein rímiliga tung tilgongd, tí hetta er ikki nakað landsstýriskvinnan kann broyta í eini kunngerð.
Mann er framvegis ongan veg komin við hesi lóg, men landsstýriskvinnan nevnir, at innan eitt ár, má okkurt vera klárt viðvíkjandi forsorgarlógini, sum eldralógin skuldi verið ein partur av, soleiðis at tey eldru fáa onkran rætt.
Mangla pengar
Landsstýriskvinnan er somuleiðis hørm um, at játtanin til eldraøkið er skerd so nógv.
- Vit hava mist seks og eina hálva millión, so tað er ikki so løgið, at vit mangla pening á øllum økjum, sigur landsstýriskvinnan, sum helst fer at biðja um eina eykajáttan, tá møguleiki verður fyri tí.
- Men verður ikki møguleiki fyri eykajáttan, so má eg bara gera sum frægast á mínum øki, staðfestir landsstýriskvinnan.
Alt í ein hatt
Eitt uppskot var á borgarafundinum, um at fáa alla eldrarøkt undir eitt økið, og at tað bara skal vera ein persónur at venda sær til. Hetta er nakað Rósa Samuelsen tekur undir við og hevur arbeitt við.
- Í Norðoyggjum og í Sandoy er tað longu soleiðis, at mann hevur eina skipan, har borgarin bara skal venda sær til ein stovn. Ætlanin er beinanvegin at fáa hetta í øllum teimum seks økjunum í landinum, so tað verður stutt frá borgaranum, sigur Rósa Samuelsen, sum vísir á, at tað skal ikki so nógv til, tí tað bara handlar um at umskipa nøkur arbeiðsgongdir á almannaøkinum.
- Økini eru longu har, so tað kostar í veruleikanum onki at gera hesar broytingarnar, greiðir Rósa Samuelsen frá. Sum metir, at henda loysn verður klár innan eitt hálvt ár.
