Per Olav Ødegård hevur eina áhugaverda grein í norska blaðnum Verdens Gang um russiska hugburðin og støðuna í Ukraina, nú meira enn tveir mánaðir eftir, at russiski herurin leyp á grannalandið.
At skjóta rakettir móti Kyiv, tá ST-aðalskrivarin er á vitjan, er at vísa vanvirðing fyri ST, Sameindum Tjóðum, og tess stovnum. Samstundis roynir Vladimir Putin at forða fyri, at krígsbrotsverk verða kannað.
- Hann heldur upp á, at russisku hermenninir hava víst stórbæri á hermótinum. Samstundis stendur ein heilur heimur og sær og hoyrir ræðuleikarnar og ágangin móti sivilfólki.
Russland brúkar sítt pláss í ST-trygdarráðnum til at leggja veto móti øllum royndum at steðga krígnum. Tískil verður stovnurin, sum skuldi verið hin týdningarmiklasti í heiminum til at loysa kreppur, virkislamdur.
Kreml brúkar talarastólin í ST til at spjaða rangar upplýsingar.
- Vladimir Putin lurtar slett ikki eftir áheitanum hjá ST-aðalskrivaranum um vápnahvíld, men ger tað í staðin vandamikið hjá ST og øðrum hjálparfelagsskapum at veita sivilum humanitera hjálp í krígsraktu økjunum.
Á vitjan síni í Ukraina sá ST-aðalskrivarin, António Guterres, vanlukkuligu avleiðingarnar av innrásini, og hann sá og hoyrdi frágreiðingar um ræðuleikarnar í býum, har russiskar herdeildir hava tikið seg aftur.
Her lógu fleiri hundrað sivilfólk deyð í gøtunum, nøkur bakbundin og skotin í høvdið. Nøkur offur vóru børn, eins og her eru fleiri frágreiðingar um neyðtøkur og aðrar atgerðir móti sivilfólki.
Rakettálopið á Kyiv hendi beint eftir fundin millum ST-aðalskrivaran og ukrainska forsetan, Volodymyr Zelenskyj, tá Kyiv annars ikki hevði verið raktur av russiskum rakettum seinastu vikurnar.
- Sambært russiska verjumálaráðnum var talan um fimm langtberandi rakettir, og hetta var størsta álop á høvuðsstaðin í umleið ein mánaða.
Per Olav Ødegård skrivar, at sambært russum sjálvum var talan um álop á eitt virki sum framleiðir rakettir, men tað, sum rakettirnar raktu, var í øllum førum ein íbúðarblokkur.
- Í minsta lagi eitt fólk læt lív og fleiri sivil vórðu særd. Tann, sum læt lív, var ein tíðindamaðurin, sum starvaðist fyri Radio Liberty, og hann búði í íbúðarbygninginum, verður lagt aftrat.
Øll greinin hjá Per Olav Ødegård kann lesast á www.vg.no.
##med2##
