- Hetta er eitt ógrundað, ókonstruktivt og ósakligt gleps!
Bjørn Kalsø, landsstýrismaður í Mentamálum, er ikki fegin um atfinningarnar hjá Herálvur Jacobsen, formanni í Lærarafelagnum, ímóti teimum avgerðum, sum eru tiknar í Klaksvík og í Havn um at leggja skúlar saman.
At leggja skúlar saman, áðrenn tað er greitt, hvussu teir skulu skipast, kallar hann óðamannaverk, sum í ringasta føri kann vera skaðiligt
Les meiri her: Í ringasta føri er tað skaðiligt
Bjørn Kalsø heldur, at formaðurin í Lærarafelagnum roynir at mála eina veruleikafjarða glansmynd av skúlunum.
Av teimum fýra skúlunum, sum hava lagt saman, var tað bara ein, sum hevur havt jampiligar hølisumstøður.
- Hinir skúlarnir, nevniliga Kommunuskúlin, Venjingarskúlin og Skúlin á Ziskatrøð, hava ikki havt góðar umstøður, og teir hava eisini húsast í fleiri bygningum.
- Avbjóðingarnar við hølisumstøðum hjá næmingum og lærarum eru sostatt ikki íkomnar av samanleggingum, sum formaðurin í Lærarafelagnum vil vera við.
Bjørn Kalsø vísir eisini á, at Mentamálaráðið hevur góðkent bygnaðin í Klaksvík og í Havn, og sostatt eru skúlarnir lagdir saman og leiðslur eru settar
- Kommunurnar hava eisini spent seg fyri at byggja nýggjar skúlabygningar Hetta lyftið mugu tær halda, tí talan er um neyðugar íløgur í næmingarnar og harvið framtíðina hjá kommununum báðum, sigur landsstýrismaðurin.
- Mentamálaráðið hevur lovað, at tilgongdin at leggja skúlarnar saman, skal vera smidlig og trygg, hvat tímajáttan til skúlarnar viðvíkur.
- Talan er um eina skiftistíð hjá samanløgdu skúlunum, sum tryggjar, at lærarar ikki verða sagdur úr starvi vegna tímajáttan, og at leiðslurnar fáa umstøður at skipa samanlagda virksemið á tryggari grund, leggur hann afturat.
Tí harmar tað hann, at formaðurin í Lærarafelagnum ”sáar mistreysti” í eina tilgongd, sum er byrjað, og sum hann veit ikki kann steðga.
- Tað harmar meg eisini, at hetta verður gjørt, uttan at víst verður á nakra gongda leið, sigur Bjørn Kalsø.
