Hvar helt tú nýggjársaftan?
- Nýggjársaftan varð hildin saman við dóttrini og sjeikinum inni á Heiðatrøðini hjá lítlusystir, Helenu, við familju.
Hvat var tað besta, sum hendi í 2023?
- Eg slapp at uppliva Michael Buble fyri 2. ferð í Royal Arena saman vid dóttrini. Hetta var ein gáva frá henni.
Tað sigur Pia Holm á Tvøroyri.
Hon leggur aftrat, at løturnar saman við verðins besta bindiklubba eisini eru dýrabarar, eins og cruise-túrurin á páskum saman við sjeikinum og góðum vinfólki var framúr.
- Eg gleðist eisini um, at sjeikurin og eg hava gjørt av at flyta saman og fara at umvæla mítt gamla barnaheim, sigur hon.
Hvat var tað keðiligasta?
- At finna út av, hvussu órættvís menniskju kunnu vera.
Gevur tú eitt nýggjárslyfti?
- Helst ikki.
Hvørjar vónir hevur tú fyri 2024?
- Eg vóni, at eg og øll míni kæru koma at hava lív og góða heilsu, og at tað verður meira friður í heiminum.
Pia Holm vísir á, at eitt nýtt ár er ein nýggj byrjan - i sátt og semju.
- Mítt ynski er eisini at skapa nýggj ævintýr og nýggj minnir saman við øllum mínum, sum eg havi kær, leggur hon aftrat.
