Klaksvík:
Sum mótkandidatur til Ársins neyðrakett hjá Dimmalætting hava fyrireikararnir av Jólaskipinum, Norðlýsið og Klaksvíkar kommuna við borgarstjóranum á odda tikið stig til at lata Ársins Rósu til ein persón ella ein bólk, sum hava gjørt eitt megnararbeiði í tí stilla við stuðuli og øðrum til onnur, ið líða neyð á ein ella annan hátt.
Hetta átakið er ógvuliga líkt Månedens buket hjá danska sjónvarpslæknanum, Peter Qvortrup Geisling, sum vitjaði í Føroyum fyrr í ár.
Niklas Heri Jákupsson, sum er ein av fyrireikarunum til Jólaskipið sigur, at hann so mangan hevur havt tað á orðið, at man átti at gjørt eitt tílíkt árligt átak fyri at rósa fólki og geva eitt hart tiltrongt herðaklapp.
? Vit onnur seta sjálvandi stóran prís uppá slíkt arbeiði, men eru kanska ikki so ógvuliga røsk at vísa teimum, ið arbeiða í tí stilla, at tey eiga okkara stuðul, og at vit virðismeta tað tey gera, siga fyrireikararnir í tíðindaskrivi.
Borgarstjórin handar
Ætlanin er, at hendan handanin skal vera í samband við røðuna hjá borgarstjóranum í samband við "Jólaskipið". Tann, ið verður kosin Ársins Rósa, fær eina stóra flotta kurv og eina silvurlagda rósu.
Fyribils arbeiðir ein nevnd, mannað við Steinbjørn O. Jacobsen, borgarstjóri sum formanni, einum umboði frá Jólaskipinum, blaðstjóranum á Norðlýsinum og einum umboði afturat úr býráðnum við hesum tiltakinum. So er ætlanin at tann, ið fær Ársins Rósu eisini skal upp í nevndina, so tann sessurin verður skiftur út á hvørjum ári.
? Tað verður kommunan, sum kemur at taka sær av hesum. Jólaskipið verður bert ein partur av nevndini, sigur Niklas Heri Jákupsson.
í tíðindaskrivinum verður eisini sagt, at hugsanin aftan fyri Ársins Rósu er ein roynd, at venda tonkunum hjá øllum til tey mongu, sum eru stuðlar undir samfelagi okkara, men sum vit mangan gloyma, nú alt skal ganga so skjótt, og vit ongantíð halda okkum hava nóg mikið av tíð í tí dagliga.
Ársins Rósa verður ongantíð givin til øll tey mongu fyrimyndarligu fólkini, ið fara fram í stillum við sínum stóra arbeiði, men hon kann vera við til at venda hugsanunum hjá øðrum til teirra í minsta lagi einaferð um árið.
Uppskot sendast inn
Fyrireikararnir vilja við hesum biðja borgarar í Klaksvíkar kommunu um at senda uppskot inn um, hvør eigur at fáa Ársins Rósu 2004.
? Vit fara at hava okkara egnu uppskot, men vit vilja fegin hava onnur við, tí tað kann vera so skjótt, at vit gloyma onkran, sum veruliga hevur uppiborið Ársins rósu, sigur Niklas Heri.
Tey, ið hava hug at senda uppskot inn, kunnu bara skriva nøkur fá orð, har navn á viðkomandi, sum man heldur átti at fingið Ársins Rósu 2004 er á og greiða eftir førimuni frá í stuttum, hví tú heldur at viðkomandi skal hava Rósuna.
Brævið kann sendast til: Ársins Rósa, boks 58, 700 Klaksvík
