Eitt FM aftrat er á veg til Klaksvíkar

Tað gongur sera væl í fótbóltinum í Klaksvík. Besta liðið á mannfólkasíðuni er stórfavorittur at vinna FM, og í dag styrkti kvinnuliðið uppaftur meiri um sína støðu í FM kappingini.

KÍ vann FM í fjør og í fyrraárið, og nú skal tað vilja verri enn illa til, um triðja FM heitið á rað ikki verður veruleiki.

Í dag átti KÍ heimavøll ímóti 07 Vestur, sum hevur ment seg heilt nógv í ár.

At tað var nummar eitt á heimavølli ímóti nummar sjey sást ikki á úrslitinum. Men fyri KÍ var tað avgerandi, at tað eydnaðist at vinna 1-0. Málið skoraði Malena Olsen longu í fjórða minutti. Tá ið tað síðsta vikuskifti eydnaðist KÍ at venda 0-2 til 2-2 við Margáir, var tað Eyðvør Klakstein, sum skoraði fyrra málið, og hon átti uppleggið til seinna málið.

Aftur í dag var tað Eyðvør Klakstein, sum  átti uppleggið, tá ið Malena Olsen setti bóltin í málið. Hetta var triðja málið í landskappingini í ár hjá 17 ára gomlu Malenu Olsen.

Síðsta lítla hálva tímar var KÍ undirmannað, eftir at miðverjin Durita Hummeland hevði sær reyða kortið.

Stóri avbjóðarin hjá KÍ í FM stríðnum hevur verið EBS/Skála, sum í dag var á útivølli ímóti NSÍ. Tær gulu úr Runavík vóru undan dagsins umfari á triðja plássi við 33 stigum – fimm stig færri enn EBS/Skála.

NSÍ vann 1-0. Málskjútti miðskeiðis í seinna hálvleiki var Laila Pætursdóttir. Tølini siga, at EBS/Skála hevði væl fleiri royndir ímóti heimamálinum, enn heimaliðið hevði ímóti málinum hjá EBS/Skála. Gestirnir høvdu seks hornaspørk og NSÍ einki, og gestirnir høvdu tíggju royndir ímóti heimamálinum, meðan NSÍ hevði sjey royndir ímóti EBS/Skála málinum.

Við 1-0 heimasigri ímóti HB vann Víkingur seg fram á bronsuplássið. Jensa Petursdóttir Olsen skoraði málið í tíggjunda minutti, og Hanna I. Højgaard átti uppspælið.

B36 vann 2-1 á heimavølli ímóti AB/B71, sum minkaði um munin í síðstu løtu.

KÍ – 07 Vestur 1-0 (1-0)

1-0: Malena Olsen

Víkingur – HB 1-0 (1-0)

1-0: Jensa Petursdóttir Olsen

NSÍ – EBS/Skála 1-0 (0-0)

1-0: Laila Pætudsdóttir

B36 – AB/B71 2-1 (1-0)

1-0: Olga Kristina Hansen

2-0: Lív Rúnadóttir

2-1: Linnéa Magnusson

Sunnudagin 10. oktober

EBS/Skála – Víkingur

07 Vestur – NSÍ

B36 – KÍ

AB/B71 - HB