Fríggjakvøldið var Spaniastova karmur um tvær konsertir - John Winston Lennon (9. oktober 1940 – 8. december 1980) til heiðurs vegna hansara 75 ára føðingardag.
Húsið kókaði, tó at tað varð byrjað ein sindur lagaliga og so skrúvað upp fyri tempo og røddini móti endanum. Bólkurin, sum spældi, var settur saman av Mikkjali Hvannastein á sologuitar, Hans Andreas Jacobsen, solo, rúttmu og sang, Rana Nolsøe, guitar og sang, Erik Biskupstøð, bass, Pætur við Keldu, klaver og sang, ein væl upplagdur Beatles-nørdi: Kai Johannesen á trummum og sang og eisini vóru gestasangarar, Jón Jacobsen og Niclas Heri Jákupsson.
Gestasangarnir komu serliga til endans og Spaniastova sigldi øll í einum ljóð- og sanghavi við m.ø. Lucy in the Skies with Diamonds, Eight days a week, A Hard days night.
Settlistin var væl samansettur við tí góða gamla: A day in the life/Jalous Guy, Come together, Nowhere Man, Strawberry Fields, Beautiful Boy, Woman, All you need is Love.
So var ein steðgur, har Andras Sólstein hevði ein fyrilestur um John Lennon, tónleikin og lív hansara.
Pætur byrjaði eftir steðgin við Imagine, sína egna serstaka og frálíku tulking - hann er tinkin úr leikum á tangentunum og frálíkur sangari. Hans Andreas sang og spældi Julia og Working Class Hero við sínum frálíka spæli og serstøku rødd og síðani aftur Pætur, Across the Universe.
Brakið helt so fram við fullband: Norwegian Wood, You got to hide your love away, Oh my love, Don´t let me down, Hey Bulldog, Revolution, I´m the Walrus við Jón sum forsangara og áhoyrararunum sum kór, Instant Karma, Lucy in the Skies with Diamonds, Eight days a week, A Hard days night, Ballad of John and Yoko.
Borgarstjóri reistist eftir konsertina og helt fyri, at hetta mundi helst vera eitt tað størsta og besta brakið av eini konsert, hann hevði verið til í Spaniastovu. Síðani handaði hann spælarunum eina rósu og legði dýran við, at hetta ikki var ein “Javnaðar-rósa”.
Takk fyri eina frálíka konsert, sum tit í Tórshavn rættiliga kunnu gleða tykkum til komandi leygarkvøld í Reinsarínum kl. 22.
- Fantastiskir tónleikarar, sangarar og einstaklingar, sum hóska væl saman, júst til eitt slíkt høvi.
