Í síðstu viku umrøddu vit 18 ára gamla Eirik Simonsen úr Havn, sum – eins og nógvir aðrir føroyingar gera – sum 16 ára gamal valdi at fara á eftirskúla í Danmark. Har spælir hann hondbólt við Viborg HK, og í síðstu viku varð hann á fyrsta sinni úttikin til dyst fyri besta lið felagsins í fremstu deildini í Danmark. Vit hyggja nú nærri at, hvør Eirikur er, og hvat hann ætlar sær.
Valið fall á býin Viborg, har siður er fyri hondbólti, og av tí at Eirikur at kalla alt sítt lív hevur spælt hondbólt, so lá hetta so væl fyri.
Liðugur á eftirskúlanum valdi hann at verða verandi í Viborg. Hann venur hondbólt og styrkisvenjing tilsamans átta ferðir um vikuna, og í gerandisdegnum hugsavnar hann seg eisini um at taka HHX-miðnámsútbúgving á Viborg Handelsgymnasium.
Gjøgnumbrot í eygsjón
Eirikur Simonsen hevur frá barnsbeini av spælt við Kyndli, har hann hevur roynst væl serliga í bakketuni. Av tí at hann einans var 16 ára gamal, tá ið hann flutti til Danmarkar, so hevur hann ikki verið at sæð í fremstu mansdeildini her heima, men hevur hann hinvegin verið fastur partur av ungdómsliðum hjá Kyndli og spældi eisini við næstfremsta liði felagsins síðstu tíðina undan fráferðini til Danmarkar.
Eirikur spælir fast á U18-liðnum hjá Viborg HK, og sleppur tríggjar ferðir um vikuna eisini at venja við besta liðnum. Í síðstu viku varð hann so á fyrsta sinni úttikin til dyst fyri besta liðið, har íslendski Oskar Bjarni Oskarsson er venjari. Í samrøðu við portalin metti Eirikur, at hetta var úrslit av góðum avrikum undir venjing seinastu tíðina.
Hann slapp ikki á vøllin og mátti frá beinkinum síggja liðfelagarnar tapa 23-25 ímóti Skive FH. Hetta merkir, at Viborg HK framvegis er í tyngra endanum á stigatalvuni, men enn eru ikki nógvir dystir leiktir og nógv lið eru sera jøvn.
Vil spæla fast
Sum ítróttarfólk flest hevur Eirikur sett sær eitt mál við hondbóltinum. Nú hann er úttikin til besta liðið, so er hann helst eisini tættari at røkka sínum málið.
– Mítt mál sum hondbóltsspælari er at spæla fast í bestu deildini í Danmark, sigur Eirikur, sum venur dúgliga fram ímóti hesum málinum.
– Eg venji tilsamans átta ferðir um vikuna styrkisvenjing og hondbólt, leggur hann afturat.
Fyribils er U18-lið felagsins framvegis hansara lið, um ein kann kalla tað so, men sleppur hann upp í tríggjar ferðir um vikuna at venja við besta liðnum.
Skaði hevur darvað
Eirikur spælir í bakketuni og kann nýtast á bakkunum og eisini sum spælbýtari. Styrki hansara hevur verið skotini, men ein skaði hevur fyribils sett hesa styrkina til viks.
– Eg havi havt trupulleikar við økslini í tvey og eitt hálvt ár, soleiðis at eg ikki havi fingið skotið, so eg havi verið noyddur at dúvað upp á onnur ting. Gjøgnumbrot og at verja eru mínar sterkastu síður, sigur Eirikur.
Ansa eftir niðurflyting
Fremsta mansliðið hjá Viborg HK, har Eirikur nú er sloppin at snúsa til, skal ansa sær, um talan ikki skal gerast um niðurflyting. 14 lið eru í bestu deildini, og í løtuni er Viborg HK á einum 11. plássi – einans eitt stig frammanfyri aftasta liðið. Kappingin er sera tøtt serliga í botninum, men Eirikur væntar, at teir megna at hóra undan.
– Vit hava mist nakrar leikarar, men vit hava eisini fingið nakrar nýggjar, og tað sær bara gott út. Tað er øgiliga ilt at siga, tí har eru fleiri lið, sum eru jøvn, men eg vænti og vóni at vit klára at halda okkum uppi, sigur Eirikur.
Tað er serliga Heino Holm Knudsen, sum hevur verið ein fongur hjá Viborg HK í ár. Við 61 málum í 11 dystum er hann fimtbesti málskjúttin í deildini og hevur stóran týdning fyri teir grønu úr Viborg, har Eirikur vónandi í framtíðini kann gerast ein avloysari.
