Sáttmáli
Tað gekk bæði skjótt og væl hjá feløgunum, sum umboða fiskimenn og reiðarar, at gera nýggjan sáttmála, sum er galdandi fram til 1. desember í 2009.
Fyrsti samráðingarfundur var týsmorgunin, og mikudagin var longu næsti fundur.
Í samrøðu við Sosialin týsdagin segði formaðurin í Føroya Reiðarafelag, Viberg Sørensen, seg hava vónir um, at feløgini fóru at koma til sættis.
Í gjár segði formaðurin í Føroya Fiskimannafelag, Jan Højgaard, at tað ikki eru krónur og oyru, sum skilja partarnar hesaferð, og hann segði seg heldur ikki vænta nakrar broytingar í hýruprosentum.
Tó løgdu báðir formenninir aftrat, at ilt er at spáa um samráðingar – og at einki er liðugt, fyrr enn alt er liðugt.
Men nú er so longu alt liðugt.
Tíðliga seinnapartin í gjár samdust feløgini so um at framleingja verandi sáttmála fram til 1. desember í 2009.
Sostatt ræður friður í viðurskiftunum millum fiskimenn og reiðarar.
Við samráðingarnar seinasta ár endaðu fiskimenn úti í verkfalli, sum vardi út í januar mánaða í ár.
