B36 hevur somu trongd sum grannarnir fyri norðan. Hon er, at liðið skal vinna allar uppgerðir, sum felagið er partur av. Árið í fjør hilnaðist væl. B36 vann Løgmanssteypið, B36 vann bronsu í landskappingini, og B36 megnaði sum fyrsta føroyska felagið nakrantíð at spæla seg víðari úr fyrsta umfarinum í europeisku meistarakappingini.
Bogin hevur verið spentur eins høgt í ár. Longu nú er greitt, at B36 fer ikki at endurvinna Løgmanssteypið. 3-1 tapið í 2. umfari 17. mars á heimavølli ímóti AB var stórur skelkur fyri tey í árstalsfelagnum. Tyngdin í álopspartinum varð avdúkað ikki at vera tann, sum hon hevur verið, og Sylla varð boðsendur fyri at vera við til at syrgja fyri, at tað fer at hilnast betri í landskappingini.
Kurt Mørkøre er nýggjur B36 venjari. Hann er vinnari um ein háls, og hann krevur nógv av sær sjálvum og spælarunum. Tað skal ganga skjótt fyri seg, og í fyrireikingarfasuni hevur tað verið eyðsýnt, at í álopspartinum skal stórt rásarúm verða fyri framrættaða Santos í vinstra borði..
Hópurin er sterkur
Liðið er góð blanding av royndum og óroyndum og av spælarum, sum eru uppaldir í B36 og teir, sum eru komnir aðra staðni frá. Av teimum sekstan, sum vóru á dómaraseðlinum í síðsta umfari í 2006, vóru tríggir útlendingar, fýra profilar sum vóru uppaldir í øðrum feløgum, og níggju spælarar ella meiri enn helmingurin vóru spælarar, sum altíð hava umboðað árstalsfelagið.
Eftir at Sylla er komin aftur til B36, eru allir teir fremstu frá liðnum í fjør uttan Obi framvegis í felagnum. Tríggir, sum hava rættuliga nógvar royndir úr fremstu deildini, eru komnir afturat. Ovi Nysted, sum áður hevur verið lyklaspælari í KÍ, har hann bæði hevur verið verjuspælari og álopsspælari, er nýggjur saman við Helga L. Petersen, sum hevur verið all round spælari í NSÍ. Allan Mørkøre er aftur í B36, eftir at hann í fjør var toppskjútti í AB.
Floksmenninir eru trúgvir og síggjast alla staðni kring landið, har B36 vitjar. Tað er ikki so undarligt, at tað verður roknað við, at B36 er partur av oddastríðnum. Í hesum túsund árinum hava teir svørtu og hvítu vunnið FM í 2001 og 2005, silvur í 2003 og 2004 og bronsu í 2006. Tí er einki at siga til, at einki uttan tað besta er nóg gott. Løgmanssteypið, sum B36 hevur vunnið í 2001 og í 2006, er fokið fyri í ár, og tí er eyka trýst á Kurt og hansara monnum í landskappingini.
