Sveinur Tróndarson
? Hiðani er einki nýtt at frætta, sigur Gunnleivur Dalsgarð um málið millum Starvsmannafelagið og Toll- og Skatt.
Trætan á innkrevjingardeildini gongur nú á aðru viku, og einki røkist enn fyri eini loysn.
Seinastu dagarnar tykist málið kortini vera farið ikki sørt av sporinum, og tað er júst tað, sum Gunnleivur Dalsgarð er ónøgdur við í løtuni.
Hann vísir á, at álitisfólkini á stovninum bara hava gjørt sína skyldu og brúkt heimildirnar tey hava í sáttmálanum.
? Tey hava heitt á okkum, um ein fund, hava fingið fundarboð og eru komin á fund saman við starvsfeløgunum. Tað kunnu tey ikki burturvísast fyri, sigur formaðurin í Starvsmannafelagnum, sum er ikki sørt uppøstur um, at leiðslan á Tolli- og Skatti ikki heldur seg til spælireglarnar.
Hann vísir á, at leiðslan á Tolli- og Skatti eigur at halda seg frá at burturvísa fólki sum gera sína fakligu skyldu.
Tí tykist trupulleikin í løtuni hava flutt seg frá at snúgva um eitt mál um ein deildarleiðara til eitt prinsippmál um hvat starvsfólk kann ella ikki kann gera tá tey eru vald til álitisfólk.
? Málið fór av sporinum tá stovnsleiðslan burturvísti álitisfólkunum og vit mugu fyrst og fremst fáa tað upp á beint, sigur Gunnleivur Dalsgarð.
Hann leggur afturat, at tað ber heilt einfalt ikki til at tosa um eina loysn ella ikki tá starvsfólk vera burturvíst, og at tað veit stovnsleiðslan væl.
? Tí má tað fáast upp á pláss fyrst, sigur Gunnleivur Dalsgarð.
Hvussu langt fara tit fyri at fáa eina loysn. Kann tað hugsast at tit fara í verkfall um tað skuldi verið?
? Tað havi eg onga viðmerking til, sigur Gunnleivur.
Uppbakning frá
øðrum feløgum
Annars fær Starvsmannafelagið uppbakning frá øðrum almennum fakfeløgum í sambandi við trætuna.
Á fundi hava hini almennu fakfeløgini gjørt eina niðurstøðu, sum sigur, at tey mótmøla harðliga, at vunnin rættindi verða niðurbrotin.
? Sáttmálin sigur heilt greitt, at tá ósemja er um mál millum leiðsluna og álitisumboðini, hava álitisumboðini rætt og skyldu til at leggja ósemjuna/málið fyri fakfelagið, verður sagt í skrivinum.
Eisini gera tey vart við, at tey ongantíð fara at góðtaka, at álitisumboð vera hótt við starvinum ella uppsøgd vegna teirra lógliga arbeiði, sum er álagt teimum sambært sáttmálanum.
Fakfeløgini vilja við hesum lýsa sín fulla stuðul til álitisumboð og starvsfólk á innkrevjingardeildini á Toll- og Skattastovuni, siga tey
Óli Heinesen ikki
at fáa fatur á
Sosialurin royndi allan fyrrapartin at fáa fatur á Óla Heinesen, stjóra á Toll- og Skatt, men tað bar ikki til.
Boðini vit fingu tá vit ringdu á skrivstovuna vóru, at Óli Heinesen hevði einki at siga fjølmiðlunum. Einki nýtt var hent í málinum, og tí hevði hann einki at leggja afturat.
Hóast vit løgdu boð vendi Óli Heinesen ikki aftur til okkara í gjár.
Vit fara kortini framhaldandi at royna at fáa eina viðmerking frá stjóranum á Toll- og Skatt, um hetta mál, sum nú næstan hevur vart í tvær vikur.
