Tað endaði málleyst, tá ið AB í dag hevði vitjan av TB, sum hevði Símun Rógva Hansen millum stólparnar. TB hevði leigað málverjan frá NSÍ, har hann er málmansvenjari.
Talan var um javna uppgerð, og bæði liðini vóru onkra ferðina framvið, uttan at tað eydnaðist at fáa bóltin í málið.
Hetta var fyrsta ferðin í ár, at tað eydnast Henrik Larsen og hansara monnum í AB at vinna stig. Javnleikurin ber við sær, at TB nú hevur fimm stig og á áttanda plássi er tvey stig undan B68, sum nú klokkan 17 spælir á útivølli ímóti ÍF.
