Tað er einki greitt enn, hvussu støðan er umborð á Athenu í løtuni. Fríggjadagin komu sløkkiliðsmenn umborð á skipið, men teir fíltust á, at hava fingið skeivar upplýsingar um eldin umborð.
- Tíverri er tað soleiðis, at tá tú hevur við eitt skip at gera, sum er skrásett aðrastaðni, eru upplýsingarnar í besta lagi ivasamar og ofta beinleiðis skeivar, sigur Ted Simpson, varaleiðari á Cornwall Fire and Rescue.
Sue Philbrow, talskvinna hjá Thor, vísir tó hesum aftur og sigur, at manningin bar seg rætt at í øllum viðurskiftum.
Í dag verða øll rúmini umborð á Athenu gjøgnumgingin, og ikki fyrr enn tað arbeiðið er liðugt ber til at siga við vissu, hvussu støðan umborð er.
Hans Andrias Joensen, reiðari, sigur, at tað verður helst ikki greitt fyrr enn í morgin, at fult tamarhald er á støðuni.
Hann dugir ikki í løtuni at siga, um tað enn brennur umborð á Athenu.
- Tað er hetta, ið sløkkiliðsmenninir í løtuni kanna, sigur Hans Andrias Joensen.
