Sveinur Tróndarson
Týsdagin stóðu tveir mans á brúnni á einum skipi, sum lá við Tórshavnar Skipasmiðju. Brádliga hoyrdu teir gjøgnum VHF?in brot úr eini samrøðu, sum gav greiðar ábendingar um, at eitt skip var í neyð.
Orð, sum »brúk fyri pumpum« og »manningin í bátarnar« hoyrdust, saman við navninum á skipinum, sum skuldi vera »Magnus Heinason«, og positiónini, sum var sjey míl eystur úr suðurendanum av Nólsoynni.
Menninir boðaðu Færøernes Kommando frá, men teir fingu um Tórshavnar Radio staðfest, at talan var ikki um Magnus Heinason, tí hann lá norðanfyri og umborð var alt, sum tað skuldi.
Kortini valdi Færøernes Kommando at senda Vædderen, sum júst var farin av Havnini, til uppgivnu positiónina at hyggja um talan kundi vera um eitt annað skip, sum veruliga var í vanda. Av tí at tað ikki var greitt, um leitað varð eftir einum skipi, ella eftir bjargingarbátum, var leitingin eitt sindur truplari, og tí vóru bæði tyrla og skip brúkt í leitingini.
Tíbetur vísti tað seg skjótt, at vera óneyðugt at leita meir, tí einki ? púrt einki ? var í økinum, har leitað varð.
Tyrlan gjørdi tað, sum kallað verður, »Expanding Square search«. Tá leitar hon í ein radius av 5 sjómíl frá positiónini, meðan Vædderen sjálvur sigldi við ættini. Tíbetur var einki at finna, og eftir stuttari tíð kundi leitingin steðgast.
