Tað var longu undan ólavsøkuróðrinum greitt, at Havfrúgvin væl og virðiliga hevði vunnið FM heitið. Hóast Vestmanna so at siga altíð hevur verið ein tann drúgvasta kappróðrarbygdin, so er hetta fyrsta ferðin, at dreingirnir umborð á Havfrúnni hava vunnið FM, og á ólavsøku negldu teir rimmarfast, at talan hevur verið um eitt framúr gott ár hjá teimum. Havfrúgvin hevði ongantíð áður vunnið á ólavsøku, men tað gjørdu teir hesa ferð, og sigurin var sannførandi.
Kollur hevur alt summar verið tann, sum hevur ligið næstur Havfrúnni, og soleiðis var eisini hesa ferð. Junkarin hevur undanfarin ár staðið seg væl ? kvívíksdreingir vunnu FM í fjør, og tá vunnu teir eisini á ólavsøku - men í ár hevur ikki hilnast nakað serligt hjá teimum. Men mikudagin royndist betri hjá Junkaranum.
Argjadreingir umborð á Bliki løgdu bragdliga fyri, og teir vóru alla tíðina við í kappingini. Tá bátarnir komu á Molan var Blikur fremstur, men munurin var lítil og eingin aftur til Junkaran og Havfrúnna.
Vestmannadreingir høvdu mestu orkuna, og á málinum vóru teir eina bátslongd frammanfyri Blik. Kollur og Junkarin vóru sera javnir, og í Havnar Róðrarfelag máttu tey staðfesta, at Drekin á ongan hátt megnaði at endurtaka úrslitið á vestanstevnu, og harvið var staðfest, at róðrarárið hjá teimum báðu dreingjamanningunum hjá Havnar Róðrarfelag var alt annað enn væleydnað. Drekin rakk sætta plássinum, og umborð á Sílinum vóru teir so galantir og gestablíðir, at teir lótu allar gestirnar koma á mál, áðrenn teir fóru um málið.
Havnarbátarnir hava annars gjørt nógv um seg seinnu árini. Drekin vann FM í 1993, 1996 og 1997, og Sílið vann FM í 1992. Í 1999 var tað eingin ivi: vestmannadreingir í nýggju Havfrúnni vóru raskastir, og á ólavsøku megnaðu teir í góðveðrinum at vísa, at tað er framtíð í kappróðrinum í Vestmanna.
