Stríðið millum Føroya Pedagogfelag og almennu arbeiðsgevararnar, ið er Kommunala Arbeiðsgevarafelagið og Lønardeildin hjá Fíggjarmálaráðnum, herðist í heilum, og tað tykist ikki sum nøkur semja er í eygsjón, nú partarnir møtast í Fasta Gerðarrættinum á middegi.
Síðstu dagarnar hava báðir partar tó ferð eftir ferð heitt á hvønn annan at koma aftur til samráðingarborðið, men útlitini fyri at tað hendir eru ikki góð. Terje Sigurðsson, semingsmaður, hevur samband við báðar partar, men kann einans staðfest, at hóast áheitanir um at koma aftur til semingsborðið, so er tíðin ikki búgvin til tað.
- Eg havi verið í samband við báðar partar fyri at vita, um teir hava nakað gott hugskot at koma burturúr hesum. Tað hevur hvørgin, sigur Terje Sigurðsson og leggur afturat.
- At kalla partarnar saman, uttan nakra sum helst ábending um, at onkur hevur okkurt, ið tey ynskja at venda eina ferð aftrat, nyttar einki.
Semingsmaðurin vísir víðari á, at tað kann gera størri skaða enn gagn at kalla partarnar saman nú.
- Eg fari ikki at kalla partarnar saman, uttan at tað er eitt endamál við at gera tað. Tað sum eg skal vera varin við er, at um einki grundarlag er fyri at kalla partarnar saman, so kann fylgjan av tí vera, at man leingir stríðið. Tað havi eg ongan sum helst áhuga í, sigur Terje Sigurðsson, og leggur afturat, at hann javnan er í samband við partarnar, og vónar at tey hugsa konstruktivt um hvussu ein loysn kann síggja út.
