Hvør er kenslan, nú Sandoyartunnilin letur upp alment í dag?
- Kenslan er heilt fantastiska góð. Hetta er eitt so stórt frambrot, at tú hevur ikki orð fyri tí, sigur Sámal Hentze á Sandi.
Hvønn týdning heldur tú, at tunnilin fer at fáa fyri Sandoynna?
- Tunilin fer at fáa stóran týdning fyri oynna og fólkið, sum her býr. Nú fáa vit frælsi til at ferðast til og frá, sum vit hava hug til - uttan at verða bundin at einari klokku ella báti.
Sært tú nakrar vansar við fasta sambandinum?
- Nei, eg síggi ongar vansar. Eg síggi hetta bara sum nakað positivt, sum fasta sambandið fer at geva okkum.
Fert tú at sakna gomlu farleiðina við Teistanum um Skopunarfjørð?
- Nei, tað fari eg ikki. Hetta kemur at gera mín arbeiðsdag so nógv lættari - at kunna koyra til og úr arbeiði.
Sámal Hentze, sum koyrir oljubil, vísir á, at tímarnir, hann hevur staðið á Gomlurætt hesi 15 árini og ikki er sloppin við Teistanum, eru nógvir.
- Ja, hevði eg vitað, hvussu nógvir teir eru tilsamans, hevði eg helst svímað.
Hann leggur aftrat, at bíleggingarskipanin, sum kom, gjørdi hesi viðurskifti nógv lættari.
