Í greining av umstøðunum hjá ymsu ítróttagreinunum í Føroyum staðfestir ÍSF, at talan í fleiri førum er um heilt vánaligar umstøður. Sjálvt hjá teimum kappingargreinum, sum hava lutfalsliga góðar umstøður – eitt nú fótbólti, hondbólti og fimleiki – er stórt trýst á fasilitetunum, og tí hevði verið ynskiligt við fleiri útbyggingum til hesar greinar.
Aðrar ítróttagreinar eru tó heilt illa fyri, staðfestir ÍSF í greiningini.
- Skjóting kundi havt betri umstøður, tí skjótibreytir kunnu vera aðrastaðni enn í Sandvíkum, Sundalagnum og Vestmanna. Men støðan er batnað samanborið við, tá breyt bara var í Havn. Hesar tríggjar breytirnar lúka tó ikki treytirnar til altjóða kappingar.
- Umstøðurnar hjá bogaskjóting eru út av lagi vánaligar, tí ongin bogaskjótibreyt er í landinum. Hetta er ein andsøgn, tá havt verður í huga, hvussu væl bogaskjúttar hava staðið seg mangan.
- Ein altjóða vøllur til golf vantar í Føroyum, og ongin ivi er um, at hevði ein tílíkur vøllur verið, hevði ítróttagreinin vaksið skjótt. Ongin høll til borðtennis er bygd, og hon má koma, skal ítróttagreinin vaksa.
- Borðtennis var næsta ítróttagreinin, ið fekk altjoða viðurkenning, men er í ólukkumát eftirbátur. Judo er somuleiðis ítróttagrein, sum er eftirbátur, tí ongin judohøll er í Føroyum. Tað er eitt knoss at halda lív í ítróttagreinini, og ábøtur krevjast skjótt.
- Tennis veksur ikki sum ítróttagrein, tí ongin høll er til ítróttagreinina. Alt ov svikaligt er at spæla tennis úti, tí tú veitst aldrin, hvussu veðrið er, og mangan er tað ringt, skrivar ÍSF í frágreiðingini, sum kann lesast á heimasíðuni hjá ÍSF.
