Kristin Michelsen, borgarstjóri á Tvøroyri, sigur, at hann ongar dulda ætlan hevur við avgerðini um at útseta býráðsfundin, sum skuldi vera seinnapartin í dag.
- Vit hava fleiri mál til viðgerðar, men onkur skjøl eru ikki klár enn, og tí er avgjørt at útseta fundin. Kommunustýrislógin sigur, at fundur skal vera eina ferð um mánaðin, og tað skulu vit nokk halda, sigur Kristin Michelsen í stuttari viðmerking.
Les eisini Ongin býráðsfundur í dag
Stutt undan jólum bórust tíðindini um, at borgarstjórin nú er í minniluta í býráðnum á Tvøroyri. Kristina Roest, sum bleiv vald inn á listanum hjá Kristini Michelsen, hevur gjørt samstarvsavtalu við Javnaðarflokkin, og telja tey nú fýra av sjey býráðslimum.
Tey hava síðani biðið um, at býráðsnevndirnar verða valdar av nýggjum. Á síðsta fundinum í farna árið noktaði borgarstjórin at seta tað ynski á skrá og vísti til, at nýggjur fundur bleiv í januar.
Nú er tann fundurin so útsettur í óvissa tíð.
Kristin Michelsen er annars lítið hugagóður at tosa um málið. Við in.fo í morgun vísir hann til tað, sum hann undan vikuskiftinum segði við R7, at tað vóru somu menn, sum oyðiløgdu Javnaðarflokkin miðskeiðis í 80’unum, sum stóðu aftanfyri hetta kvettið móti sær.
- Teir mistu valdið í síni egnu háborg í 20 ár, líka til eg kom upp í flokkin. Tá byrjaði flokkurin aftur at veksa og hevur síðani voksið seg heilt stóran. Men nú er tað ikki í lagi longur, sigur Kristin Michelsen.
Men tú ert framvegis loyalur mótvegis Javnaðarflokkinum?
- Tað velst um hann er loyalur móti mær. Tað koyrir báðar vegir, sigur hann.
