Heilsufakliga er tað ikki ráðiligt at fáa dialysuviðgerð á Klaksvíkar Sjúkrahúsi.
Tað staðfestir Sirið Stenberg, landsstýriskvinna í heilsumálum.
Bjørn Kalsø, løgtingsmaður, hevur spurt hana, hvussu varð við ætlanini at fáa dialysuviðgerð á Klaksvíkar Sjúkrahúsi.
Sirið Stenberg vísir á, at undanfarni landsstýrismaður í heilsumálum, Kartsen Hansen, hevði ætlanir um at seta í dialysuviðgerð í verk á Klaksvíkar sjúkrahúsi, og tað varð eisini gjørt eitt ávíst greiningararbeiði í hesum sambandi.
Samstundis varð Landslæknin biðin um eina heilsufakliga meting av at seta eina tílíka skipan í verk í Klaksvík.
Landslæknin sigur, at ein satelittskipan kann verða sett í verk í Klaksvík verða sett í verk fyri vanligar, sjúklingar, sum ikki eru so ringir, og sum annars kunnu fáa dialysu heima.
Hetta var tó treytað av, at visitering, faklig ábyrgd og leiðsluábyrgd var á Dialysudeildini á Landssjúkrahúsinum og undir ábyrgd av avvarðandi serlækna fyri økið.
Men tað vísti seg, at talan var bara um ein sjúkling í Norðoyggjum, sum var egnaður at fáa dialysu heima, og hann hevði longu fingið bjóðað at fáa dialysumaskinu heima.
- Samstundis gjørdi leiðslan á Landssjúkrahúsinum, og avvarðandi serlækni fyri økið, av, at sjúkrahúsið ikki kundi taka ábyrgd fyri eini satelittviðgerð á Klaksvíkar sjúkrahúsi.
- Soleiðis vóru fortreytirnar og grundarlagið stórt sæð burtur, fyri at seta í verk eina tílíka skipan í Klaksvík, sigur Sirið Stenberg.
Hon heldur kortini, at er tað heilsufakliga forsvarligt, hevði tað verið skilagott at fingið dialysiviðgerð á Klaksvíkar Sjúkrahúsi.
Sirið Stenberg leggur afturat, at tey fylgja við menningini og gongdini á økinum. Og hon staðfestir, at broytast fortreytirnar, er hon fús at taka málið upp aftur við avvarðandi partar, fyri at finna loysnir, har viðgerðin kann veitast í nærumhvørvinum.
