Tá Jørgen Niclasen valdi at stevna Kringvarpinum og portalinum fyri ærumeiðing, var tað helst bara fyri at fáa Kringvarpið og samgonguna at tiga, heldur Sveinur Tróndarsson, fyrrverandi tíðindaleiðari á portal.fo.
Fyrr í summar valdi Jørgen Niclasen at stevna Dia Midjord, Liljuni Weihe og Jan Lamhauge í Kringvarpinum, og Sveini Tróndarsson á portal.fo fyri ærumeiðing.
Síðani hevur so at siga einki verið at frætt um tollmálið, og við in.fo í dag sigur Liljan Weihe, at tey ikki hava fingið munnkurv, men at hon og Jan Lamhauge ikki kunnu standa á odda fyri tíðindaflutningi í sambandi við tollmálið, tí tað "gruggar" málið.
Sveinur Tróndarson heldur, at tá Jørgen Niclasen á hendan hátt velur at stevna bert fáar dagar áðrenn málið var fyrnað, er tað bert ein háttur at fáa arbeiðsfrið, og samstundis avmontera tíðindaflutningin í hesum sambandi.
- Fólkaflokkurin hevur miðvíst roynt at niðurgjørt og avmonterað Kringvarpið, og stevningin er eisini eitt beinleiðis álop á Kringvarpið, heldur Sveinur Tróndarsson.
Hann vísir kortini á, at søgan um tollmálið als ikki er liðugt viðgjørd, tí meðan málið koyrir í rættinum, fara journalistar helst at spyrja inn til viðurskiftini handan málið.
Samstundis heldur Sveinur, at summarfrítíðin helst hevur ávirkað soleiðis, at málið ikki hevur verið í miðlunum.
