Tað er farið at vára, og summarið stundar til. Veðrið er lýggjari, og onkur sóldagur hevur verið.
Hetta er tíðin, tá starvsfólkaútferðin verður fyrireikað, og hetta er tíðin, tá familjur, vinir ella kenningar hava hug at uppliva okkurt saman. Onkur vil til fjals, og onkur vil sleppa at sigla, síggja og uppliva.
Ein fantastiskur møguleiki er at leiga snøggu skonnartina, Norðlýsið, við manning, og her kanst tú seta dagsskránna saman við manningini.
Norðlýsið kann sigla við 45 fólkum, men á einum leigutúri er vanligt, at talið av ferðandi liggur millum 12 og 14.
Útgerðarmaður er Frank Djurhuus Jakobsen, og hann sigur, at næstan einki er ómøguligt.
- Ein leigutúrur skal vera behagiligur, og fólk skulu ikki troyttast. Fólk kunnu velja at sigla nógv, og tey kunnu eisini velja at sigla minni.
Bert hugflogið setir mørkini.
- Vit kunnu heinta fólk í Leirvík, sigla út í Hest ella Koltur, seta tey av, og tá tey hava havt eina løtu í landi, koma tey umborð aftur til eina góða fiskasuppu. Síðan seta vit tey av aftur á Gomlurætt, haðani tey fara víðari í bili ella bussi - ella, vit sigla tey heimaftur, har ferðin byrjaði.
Nólsoy er eisini eitt gott høvi her í miðstaðarøkinum, men túrar kunnu bíleggjast um alt landið.
- Tað eru serliga útlendingar, sum fáa burtur úr at sigla og síggja, meðan føroyingar, sum í fleiri førum kenna landið nakað betur, kanska heldur vilja uppliva okkurt, meðan tey eru umborð.
Útgerðarmaðurin sigur, at møguleikarnir til leigutúrar næstan eru óendaligir.
- Tey eru eisini mong, sum spyrja eftir fiskitúrum, og hetta er nú eisini ein møguleiki. Vit bjóða fólki umborð at fiska við snøri og vaðbeini.
Manningin er til reiðar at hagreiða fongin, um fólk ynskja tað, og kokkurin ger eina máltíð úr fonginum, áðrenn farið verður í land.
- Á einum sightseeing-túri fáa gestirnir høvi at njóta skipið og umhvørvið, sigur Frank Djurhuus Jakobsen.
Eru líkindini, verða seglini sett.
Á heimasíðuni www.tn24.fo verður kunnað um túrar, sum liggja í skrá, og heimasíðan verður leypandi dagførd, tá nýggir túrar, sum fólk kunnu tilmelda seg til, verða settir á skrá, summir við lutfalsliga stuttum skoðbrái.
